香港文匯報訊（記者 梁靜儀）台慶劇《巨塔之後》昨晚（20日）播出的第16集，宣萱和庭鋒的母子相認場口獲大讚相當感人。
談到相關場口，宣萱曾公開表示此場戲最難忘，演戲經驗爐火純青的她、更謙稱場口很具挑戰性：「因為未埋位前，我都未諗到自己將會點做（演），但後尾一Roll機就做到。」宣萱還大讚庭鋒有驚喜又親切：「佢畀到好大驚喜我，大家Day 1見到嗰陣，已經有一種連繫喺度」。
庭鋒透露為了好好培養情緒，他與宣萱都進入了「安靜投入Mode」：「我記得嗰日好早已經到咗，因為呢場好緊要。我冇喺拍之前同Jessica講好多嘢，因為我都知道佢都要培養情緒，我驚騷擾到佢，而且我自己都要Focus，要諗下點演。呢場戲係要好用心咁去感受、所以好難去設計定太多嘢。」
雖然場口難度高，但庭鋒與宣萱竟在零NG情況下順利完成，相當厲害，庭鋒：「我哋拍咗3 take，一個Wide shot、各自一個Tight shot。我記得嗰一刻我哋都好融入喺嗰情感入面，同埋每一take Jessica（宣萱）都畀咗好大情感我，所以先咁順利。」
庭鋒坦言除因宣萱畀足感情幫到他入戲、宣萱的親切感以及二人平時暢所欲言的相處模式亦甚有幫助：「傾偈過程令我哋變咗好似好耐冇見嘅朋友咁，令到我有少少忘記係演緊戲，咁反而可以幫助我放鬆、從而更投入到做戲！（你哋平時主要講啲乜？）好Casual㗎，姐姐（宣萱暱稱）咩都講㗎，例如會講下英國嘅讀書同生活，有時仲會無啦啦講咗英文，好親切。我又試過問佢：『咁多經典劇，你最鍾意邊套（角色）？』姐姐份人都好率直，所以真係咩都會講。」談到劇中要演繹不少手語動作，獲網民大讚做足功課，庭鋒坦言確是收到手語片已馬上練至滾瓜爛熟，皆因他覺得這樣做出來的手語才自然；他又笑言當年因受到《十月初五的月光》初哥哥「啟發」做手語，故一直想學手語：「所以當我知道要做手語，更加覺得好好玩、好有發揮。」